இரசாயன உரங்களைப் பயன்படுத்தினால் ஒரு ஆண்டு ஜெயில், ரூ.1 லட்சம் அபராதம்!

மண்ணை மலடாக்கி, பயிர்களை நஞ்சாக்கும்
இரசாயன உரங்களைப் பயன்படுத்தினால்ஒரு ஆண்டு ஜெயில், ரூ.1 லட்சம் அபராதம்!உத்தரகாண்ட் முதல்வர் அதிரடி அறிவிப்பு!!

டேராடூன், நவ.16-

மண்ணை மலடாக்கி, பயிர்களை நாசம் செய்யும் இரசாயன உரங்களைப் பயன்படுத்தினால் ஒரு ஆண்டு ஜெயில் தண்டனை விதிக்கப்படுவதுடன், ரூ.1 லட்சம் அபராதம் விதிக்கப்படும் என உத்தரகாண்ட் முதல்வர் திரு.திரிவேந்திர சிங் ராவத் அதிரடியாக அறிவித்துள்ளார்.

அந்த காலங்களில் இயற்கையான உரங்களை பயன்படுத்தி, ஆரோக்கியமான வாழ்வை மக்கள் வாழ்ந்து வந்தனர். ஆனால், நாட்கள் செல்ல, செல்ல இயற்கை உரங்களை கைவிட்ட விவசாயிகள் பலர், செயற்கை உரங்களை பயன்படுத்தத் தொடங்கினர்.

இதனால் விளைநிலங்கள் மற்றும் மண் பல்வேறு பாதிப்புகளை சந்தித்து வரும் நிலையில், உத்தரகாண்ட் மாநில அரசு அதிரடி முடிவு ஒன்றை எடுத்துள்ளது.

அம்மாநில முதலமைச்சர் திரிவேந்திர சிங் ராவத் பேசும்போது, விவசாய நிலங்களில் ரசாயன பூச்சிக்கொல்லி பயன்படுத்தப்படுவதை தடுக்கும் வகையில் புதிய விவசாய சட்டம் 2019-ஆம் ஆண்டு இயற்றப்பட உள்ளது என்று தெரிவித்தார்.

மேலும், முதற்கட்டமாக மாநிலத்தில் 8 பகுதிகள் தேர்வு செய்யப்பட்டு, அந்த பகுதிகளில் செயற்கை உரங்கள் தடை செய்யப்படும் என்றும், அந்த விதியை மீறி செயற்கை உரங்களை பயன்படுத்தினால், 1 லட்சம் ரூபாய் அபாரதம், ஒரு ஆண்டு சிறைத்தண்டனை விதிக்கப்படும் என்றும் முதலமைச்சர் தெரிவித்துள்ளார். இச்சட்டம் வரும் சட்டசபை குளிர்கால கூட்டத்தொடரில் இயற்றப்படும் என்றும் அவர் தெரிவித்துள்ளார்.